ကွန်နာဂစ်

ကွန်နာဂစ်

ကျွန်မဘယ်လိုပင် မြန်မြန်အရောက်သွားဖို့ ကြိုးစားခဲ့ပေမဲ့ တကယ်တမ်း ကျွန်မရောက်ရှိသွားချိန်မှာတော့ လယ်စပ်ချောင်းစပ်နှင့် မြစ်ရိုးတစ်လျှောက်တွင် သနားစဖွယ်အသံလေးဖြင့် အော်မြည်နေသော ကွန်နာဂစ်ငှက်ကလေးများစွာကိုပဲ တွေ့မြင်ခွင့်ရခဲ့တော့သည်။ ကွန်နာဂစ်ငှက်ကလေးများမှာ အဖို၊ အမ၊ ငှက်ပေါက်စသည်ဖြင့် အရွယ်စုံပင်။ သားငယ်သမီးငယ်ရှာသူအသံကတစ်မျိုး၊ အဖေအမေပျောက်ရှာသူအသံကတစ်ဘာသာ၊ တပည့်ပျောက်ဆရာ့အသံကတစ်ဖုံပေမဲ့ အလုံးစုံသောအသံများ၏ တူညီသောကာရန်မှာ ကြေကွဲခြင်းသာဖြစ်နေ၏။ “မြစ်တစ်စင်းမှ၊ ချစ်ခြင်းအားဖြင့် ချောင်းကိုဆင့်ရာ.. “အစရှိသည့်မြစ်နှင့်ချောင်းတို့၏ လူသားများအပေါ် အကျိုးပြုပုံကိုဖွဲ့ထားသော ကျွန်မကဗျာတစ်ပုဒ်သည်လည်း ကွန်နာဂစ်ငှက်ကလေးများ၏ မျက်ရေဖြင့် ဆွေးမြည့်စုတ်ပြတ်သွားခဲ့ပြီ။

ကွန်ဂဒူး
မင်းသုဝဏ်

ချောင်းရေကလျှံ ကန်ရေကတိုး၊ ကြိုလာပါနဲ့ ရွှေရောင်ရစ်ကယ်၊ ရေနစ်မှာပါတဲ့စိုး။ ။
သားငယ်ကလေးကို ခါးထစ်ခွင်ချီ၍လည်းကောင်း၊ ကောက်စိုက်တံကို လက်တစ်ဖက်တွင် စွဲကိုင်၍လည်းကောင်း၊ ပီလမခေါ်သော ဂဒူးကြီးကို ဦးခေါင်းထက်တွင်အုပ်ဆောင်း၍လည်းကောင်း မွန်ကောက်စိုက်မလေးသည် သီချင်းကလေးတကြော်ကြော်နှင့် တော်ထနီးရွာကလေးမှထွက်လာသည်ကို မွန်လူမျိုးတို့ မတိမ်ကောသေးမီရှေးအခါက တွေ့ရပေသည်။ သီချင်းကလေးတအေးအေးနှင့်ပင်ဖြစ်သော်လည်း အဆိုပါမွန်မလေးသည် ပျော်ပါးရွှင်ပျနေသည်မဟုတ်၊ နှလုံးအတွင်း၌ တောက်လောင်လျက်ရှိသော ပရိဒေဝမီး၏ အေးယောင်ယောင်နှင့် ပူလောင်လှသောမီးလျှံသည် သီချင်းအဖြစ်နှင့်ထွက်ပေါ်လာခြင်းဖြစ်သည်။ အနောက်တောင် ဒီဆိုင်ကျွန်းညို့ကြီးမှ တမည်းမည်း တက်ရောက်ပွားများလာသော တိမ်တောင် တိမ်လိပ် မိုးသားမိုးသွေးတို့က လွမ်းဟောင်းတွင် လွမ်းသစ်ကို လောင်းလေသောကြောင့် ကွယ်လွန်သူယောက်ျားသည် အချစ်ဦးအား တမ်းတလျက် စိတ်ရူးပေါက်တိုင်း သီဆိုခြင်းဖြစ်၏။ မိုးသည်အလွမ်းဓာတ်ကို ပွားများစေတတ်၏။ ထို့ကြောင့်ပင်လျင် ရှေးစာဆိုကဝိကြီးများက မိုးရာသီရွာသွန်းသောမိုးကို “လွမ်းတုန်းရွာသောမိုး“ဟု ခေါ်ဝေါ်သမုတ်၍ အသိအမှတ်လုပ်ကြလေသည်။ စစ်ပွဲသဘင်စံရွှင်တော်မူခိုက် ခေတ္တမျှကွဲကွာနေသော တောင်ငူဘုရင်နတ်ရှင်နောင်ကို မြောက်သားတော် ရာဇဓာတုကလျာက “ညွှတ်ရုံးကြာတူ၊ ဖော်နည်းသူကို၊ သည်းအူပြတ်ခေါင်၊ ကြွေလွယ်အောင်လျင်၊ လေဆောင်ပြင်းထန် ကြောက်ဖွယ်လွန်စွ“ စသည်ဖြင့် ဖွဲ့နွဲ့လွမ်းဆွတ်ပါလျင် မပြန်သောခရီးကို တစ်ကိုယ်တည်းသွားရရှာသော ခင်ပွန်းသည်အား အဆိုပါမွန်မုဆိုးမလေးသည် မည်မျှလွမ်းဆွတ်တသမည်ကို မတွေးတတ်အောင်ရှိတော့သည်။ လွန်ခဲ့သောမိုးရာသီက ဤသို့မိုးညို့သောအခါတွင် ဤရွာထွက်ခရီး၌ မိမိတို့မောင်နှံစုံတို့သည် ပျော်ပျော်ပါးပါးခရီးသွားခဲ့ကြဖူး၏။ ထိုမျှမကသေး၊ ငယ်စဉ်တောင်ကျေးကလေးဘဝစဉ်ကလည်း ဤခရီးတွင် နှစ်ယောက်တွဲ၍ အကြိမ်ပေါင်းများစွာရွှင်နွှဲခဲ့ဖူးကြ၏။ ယခုအခါတွင်ကား သားငယ်နှင့်မိမိသာရှိ၏။ သားငယ်၏ဖခင်ကား ရွာပြင်ကထိန်ပင်အောက်တွင် တစ်ယောက်တည်းဆွေးမြည့်ရှာလေပြီ။ မြေသြဇာဖြစ်ရလေပြီ။ ထို့ကြောင့်ပင်လျင် အသည်းအူပြောင်းပြန်လန်လောက်အောင် လွမ်းဆွတ်ကြေကွဲရခြင်းဖြစ်၏။ မိခင်၏တေးသံဖြင့် ဘာမသိညာမသိမြူးထူးနေသော သားငယ်သည်ကား မိခင်၏ဆံပင်ကို ဆွဲလိုက်၊ တွတ်တီးတွတ်တာပြောလိုက်၊ ပြုံးလိုက်ရယ်လိုက်ရှိရှာ၏။ မိုးသာလျင် မွန်မလေး၏အလွမ်းကို ပွားများစေသည်မဟုတ်။ သားငယ်ကလေးသည်လည်း ပွားများစေသည်ဖြစ်သည်။ မိုးနှင့်သားငယ်သာမဟုတ်သေး။ ဤရပ်ဤရွာ ဤခရီး ဤလမ်း ဤလယ် ဤတောတို့သည် မိမိတို့၏ ရှေးဖြစ်ရှေးဟောင်းရာဇဝင်ကြောင်းကို ကွက်ကွက်ကွင်းကွင်း ဇာတ်ခင်း၍ပြလေသောကြောင့် အလွမ်းအားဆေးကြီးဖြစ်တော့သည်။ တဖြည်းဖြည်းနှင့်ပင် မွန်မလေး၏မျက်နှာသည် မိုးမင်းကို ဂုဏ်ပြိုင်၍ ညှိုးမှိန်လာလေ၏။ မိုးရွာလျင် ရွာချင်းယိုထွက်ပါအံ့ ဟူသော အဓိဋ္ဌာန်ကြီးဖြင့် အခါလင့်၍ ရှိသောမျက်ရည်တို့သည်ကား ပန်းပြေးပွဲတွင် တာစူနေသောသူတို့နှင့်သာ တူတော့၏။
ထိုသို့လွမ်းတစ်ခါဆွေးတစ်လှည့်နှင် တေးဖွဲ့၍့လာခဲ့ရာ မိမိတွက်တာဝေပုံချထားသောငန်းဦးသို့ ရောက်လာလေ၏။ ကူညီမည့်သူလည်းမရှိ၊ အားပေးမည့်သူလည်းမရှိ။ အားငယ်ဖွယ်ပင်ဖြစ်တော့၏။ အလုပ်တွင်စိတ်မပါတော့။ ကန်သင်းပေါ်တွင် ထိုင်၍ချောင်းပေါက်အောင် ငိုကြွေးချင်တော့၏။ တစ်မိုးလုံးပြည့်နေသောတိမ်တိုက်များ လွှင့်စဉ်ပျောက်ပျက်သွားအောင် ဟစ်အော်လိုက်ချင်တော့၏။ သို့ပါသော် လည်း သားငယ်နှင့် မိမိအတွက်ဝမ်းစာရေးက ရှိလေသေးသည်။ ပြည်တွင်းရေးထက်ဝမ်းရေးခက်၊ ဝမ်းရေးထက် လွမ်းရေးခက်ဟုဆိုသော်လည်း ဝမ်းရေးကို လုံးလုံးလျစ်လျူမရှု့နိုင်။ မိမိတစ်ကိုယ်အတွက် မထောင်းသာသော်လည်း ဖတဆိုးသားလေးအတွက် အရေးကြီးလေသည်။ လွမ်းဆွေးနေ၍ မည်သူကမျှ ကြင်နာမည်မဟုတ်။ ပြည့်စုံခြင်း သမတ္တိသာ အရသာကို ခံစားနေရသော လောကကြီးကား မိမိ၏ပရိဒေဝမီးကို နားလည်နိုင်မည် မဟုတ်ပေ။ အရိပ်အမြွက်မျှ သိဖို့ပင်လျင်ခဲယဉ်းလှ၏။ ဆင်းရဲသူ မုဆိုးမကလေးဖြစ်လေသောကြောင့် အထူးတလည် လျစ်လျူရှု့ကြမည်ဖြစ်၏။ ထို့ကြောင့် လမုပင်ကြီးတစ်ခု၏ အရိပ်အောက်မြေညီ၌ သားငယ်ကလေးကိုဂဒူးထဲတွင် သိပ်ထား၍ နောက်ဆံတငင်ငင်နှင့်ပင် လုပ်ငန်းသို့ ဝင်ရလေတော့၏။ လုပ်ငန်းသို့ဝင်ရသော်လည်း အလုပ်တွင်စိတ်မရှိ။ ကောက်စိုက်တံနှင့် ပျိူးပင်ကလေးတို့သည်လည်း မိမိတို့ဘာဝအလျောက် စိုက်သူကစိုက် ပေါက်သူကပေါက်လျက် အကွက်ကျကျ ဖြစ်နေကြကုန်၏။ မတည်သောစိတ်သည်ကား အရပ်ဆယ်မျက်နှာတွင် လွင့်ပါးလျက်ရှိ၏။ ဗျိုင်းဖြူကလေးများ ပျံသည်ကိုမြင်လျင် သူတို့နှင့်ရော၍ပျံ၏။ တိမ်တိုက်ကြီးများလွင့်နေသည်ကို မြင်လျင် သူတို့နှင့်ရော၍လွင့်၏။ လယ်ကတွတ်ပေါက်မှ တသွင်သွင်စီးကျနေသော ရေသံကိုကြားလျင် ယင်းတို့နှင့်ရော၍ ကြွေးကြော်သီဆို၏။ လောကဓာတ်တစ်ခုလုံးတွင် မည်သည့်အရာကိုမျှ အတည်တကျ သတိရသည်မရှိ။ သားငယ်ကလေးကိုပင်လည်း တစ်ချက်တစ်ချက် မေ့လျော့မိတော့၏။ ပရိဒေဝမီးကား ပူပြင်းလေစွတကား။ သို့ဖြင့် မွန်းတည့်ရာတွင်မှ မွန်းတိမ်း၊ မွန်းတိမ်းရာမှ နေစောင်းခဲ့၏။ အလုပ်ချိန်လည်းကုန်လေပြီ။ တစ်ကိုယ်လုံးလည်း အေးစက်တောင့်တင်း၍ မောပန်းနွမ်းလျလေပြီ။ သားငယ်ကိုပိုက်၍ အိမ်ပြန်ဖို့သာ ကျန်တော့သည်။ ကန်သင်းမျှမပေါ်နိုင်။ တက်ရေဖြင့်ဖွေးလျက် ပင်လယ်ပြင်နှင့်တူသောလယ်ကွင်းကို ဖြတ်ကျော်၍ သားငယ်ရှိရာသို့ မျှော်ကြည့်လေ၏။ မြေပြင်ကိုမမြင်ရ။ ရေပြင်ကိုသာမြင်ရလေတော့၏။ ထိုအခါမှမျက်လုံးမျက်ဆန်ပြူး၍ ပူပန်ခြင်းပြင်းစွာနှင့် ပြေးသွားရှာဖွေသော်လည်း မတွေ့ရတော့ချေ။ သားငယ်နှင့်တကွသော ဂဒူးကြီးသည်ကား တက်ရေတွင် မျောပါသွားရှာလေပြီ။ ကယ်ပါယူပါနှင့် တစာစာအော်သော်လည်း အနီးပတ်လည်တွင် လူမရှိ။ ဆူးခြုံထဲတွင် ရှိနိုးနိုး၊ ဓနုတောထဲတွင် မြင်ရနိုးနိုးနှင့် တောင်ပြေးကာ၊ မြောက်ကူးကာ ဒေါင်းတောက်အောင်ရှာသော်လည်း ဖတဆိုးလူမမည်လေးကို ဘယ်တွင်မျှမတွေ့ရတော့ချေ။ ကံဆိုးမသွားလေရာ မိုးလိုက်လို့ရွာပြီတကား။

“အိုလူကလေးရဲ့၊ ရွှေသွေးရဲ့၊ မင်းဘယ်ကိုသွားလေပြီလဲ။ မင်းအဖေရေနံချောင်းကို မုန့်ပေါင်းသွားဝယ်တာ မစောင့်နိုင်လို့ လိုက်သွားပြီလားကွယ့်။ မပဋာရဲ့သားတွေလို ရေတွင်နစ်၍ဆုံးရှာပြီလား။ စွန်ချီ၍ပျောက်ရှာပြီလား။ ယောက်ျားသေစဉ်က ဖြေစရာသားကျန်သေး၏။ သားသေပြန်တော့မိခင်မှာ ဘယ်လိုခဲလို့ဖြေရပါ့မလဲ။ ရွာပြန်သွားလို့ ညည်းသားဘယ်မှလည်း မေးရင်မိခင်ဘယ်လိုပြောရမယ်။ မိတ္ထီလာကန်တော်အောက်က ဖားကောက်ခဲ့တဲ့လူတွေကိုမှ မစောင့်နိုင်တော့ဘူးလားကွယ်။ လူကလေးအိပ်ချိန်တန်လို့ ဗျိုင်းရှေ့ကပျံပါပြီ။ လူကလေးထွက်ခဲ့ပါတော့။ မြစ်ဧရာနဒီတွင်းမှာ ငါးကြင်းဖမ်းသွားရော့သလားကွယ်။”
မွန်မကလေးမှာ လင်သေရာတွင် သားဆုံးပြန်သဖြင့် အရူးလုံးလုံးဖြစ်ရလေတော့သည်။ “တစ်ပူပေါ်တစ်ပူထပ် မလပ်ကလေးရယ်တဲ့ ဘယ်ညာ“ဆိုသော ဘဝသို့ရောက်ရလေတော့၏။ ထမင်းမှန်း မသိဟင်းမှန်းမသိ၊ ရင်ဘတ်ကလေးထုကာ၊ နဖူးကလေးရိုက်ခါနှင့် ငိုကြွေးမြည်တမ်းလျက် ရေစုန်ရေဆန်လိုက်၍ သားပျောက်ကိုရှာ၏။ တွေ့သမျှ လှေသမားတို့ကိုလည်း “သားငယ်ကလေးတစ်ယောက် မျက်လုံးဝိုင်းကလေးနှင့် ဂဒူးကြီးစီးပြီးသွားတာ မတွေ့လိုက်ကြဘူးလားရှင့်။ တော်ထနီးရွာက သူ့မိခင်ကို ဘာလက်ဆောင်ပါးလိုက်သေးလဲရှင့်”စသည်ဖြင့် မေးမိမေးရာမေးလေတော့၏။ ညဉ့်မှန်မသိ၊ နေ့မှန်းမသိ တငိုငိုတယိုယိုနှင့် သားပျောက်ကိုရှာရင်း ပင်မြစ်ရိုးတွင် ရင်ကွဲ၍ သေပွဲသို့ဝင်ရှာလေတော့၏။ အလွမ်းဇာတ်သိမ်း၍ အပူဇာတ်ဆုံးလေတော့၏။

သို့သော် ထိုမွန်မကလေးသည် သားငယ်ကိုစွဲလန်းသောစိတ်နှင့် သေရှာလေသောကြောင့် နောင်ဘဝ၌ “ကွန်ဂဒူး“ငှက်ကလေးဖြစ်လာသည်ဟု လူကြီးသူမများက ပြောပြန်လေသည်။ သို့ဖြစ်လျင် အပူဇာတ်မဆုံးသေး။ အကြောင်းသော် နေညိုညိုညနေစောင်းအခါများ၌ မြစ်ရိုးတစ်လျှောက်တွင် သနားစဖွယ် အားငယ်သောအသံကလေးနှင့် အော်မြည်နေသော ကွန်ဂဒူးငှက်ကလေးကို ယနေ့ထက်တိုင်အောင် ကြားမြင်ရပါသေးသည်။ ပျောက်ဆုံးရှာသော သားငယ်လေးကို တွေ့ရနိုးမြင်ရနိုးနှင့် မြစ်ရိုးတစ်လျှောက်တွင် ရှာဖွေနေတုန်းပင် ဖြစ်လေရော့သလားမသိ။
(“ကွန်”ကား မွန်အခေါ်ဖြင့် “သားငယ်”ဟု ဆိုလို၏ ။“ဂဒူး”ကားဓနိအင်ဖက်၊ စလူရွက်တို့ဖြင့် ချုပ်စပ်ပြုလုပ်ထားသော ဆောင်းစရာပီလမဖြစ်လေသည်။)