စိန်ကက်ဆက်

>> Friday, May 9, 2008

ကိုဇနိက ညီပုလေးရဲ့ “ရွှေမန်ကျည်းခုနှစ်စင်” (အဲဒီဝတ္ထုတိုက ဒီလင့်မှာကိုဇနိတင်ပေးထားပါတယ်) ဆိုတဲ့ ဝတ္ထုတိုလေးပို့ပေးတော့ ငယ်ငယ်တုန်းကကျွန်တော်စက်လိုက်ဖွင့်တာကိုသတိရတယ်။ ညီပုလေးထဲကပုဂ္ဂိုလ်တို့ခေတ်ကဓါတ်ပြားခေတ်။ ကျွန်တော်ဖွင့်ဖူးတဲ့ခေတ်ကတော့ ၉၅-၉၆လောက်ကဆိုတော့ ကာရာအိုကေကက်ဆက်ခေတ်လို့ပြောရမလိုပဲ။ မြို့၊ရွာမရွေး အလှူမင်္ဂလာမကျန်အကုန်ဖွင့်ဖူးတယ်။ ကိုယ်တိုင်ဖွင့်ရတာတော့မဟုတ်ဘူး။ အဒေါ်ယောက်ျားက သူ့ညီနဲ့အတူအကူလိုက်ပေးပါဆိုလို့ သူ့စက်ကိုအကူလိုက်ဖွင့်ပေးရတာ။ ကျွန်တော်တို့နှစ်ယောက်နဲ့အတူ ‘ကိုသူတော်’ဆိုတဲ့အကူတစ်ယောက်လဲပါတယ်။ ဒီလူက နာမည်ကသာ ကိုသူတော်၊ တစ်ချိန်လုံးအရက်မူးနေတာ။ ထန်းရည်ပေါတဲ့ရွာများရောက်လို့ကတော့ စက်သိမ်းလို့ပြန်ကာနီးမှသူ့လိုက်ခေါ်ရတာ။ ရွာတိုင်းမှာသူနဲ့မသိတဲ့ကာလသားကလဲ ခပ်ရှားရှား။ အဒေါ်ယောက်ျားညီက ကိုဆန်းတဲ့။ သဘောကတော့အရမ်းကောင်းတယ်။ လူကတော့လူပွေ၊ တစ်ရွာတစ်ယောက်လောက်ကိုရည်းစားရှိတယ်။ ကွမ်းကတော့အသေစားတဲ့လူ၊ သူ့ပါးစပ်ကိုကြည့်လိုက်ရင် အမြဲရဲပတောင်းခပ်နေတာ။ ကျွန်တော်လိုက်ရတဲ့အချိန်က သိပ်တော့မကြာလိုက်ပါဘူး၊ နွေရာသီကျောင်းတွေပိတ်နေတဲ့အချိန်ပေါ့။ ကျွန်တော်လဲပျင်းတာနဲ့ သီချင်းလဲဝါသနာပါတော့ သူတို့သွားတဲ့နေရာတိုင်းလိုက်တယ်။ ဖားယားကြီး၊ရေဆည်ကြီးစတဲ့အရှေ့ဘက်ကရွာတွေကအစ၊ ဆင်နင်းဗိုလ်၊ပေါက်မှော်စတဲ့အနောက်ဘက်ရွာတွေအဆုံး ကျွန်တော်တို့စက်ကအနှံ့ရောက်တယ်။ မြို့မှာလဲ မြို့တော်ခန်းမ၊ ၁၁-လမ်း အ.မ.က၊ အရှေ့လမ်းခန်းမစသည်ဖြင့် မင်္ဂလာဆောင်တဲ့နေရာတွေအကုန်လုံးရောက်တယ်။ တွေ့ဖူးမြင်ဖူးတာတွေလဲစုံသွားတယ်။ အဲဒီတုန်းက ကျွန်တော့်အသက်ကရှိလှ ဆယ့်ခြောက်နှစ်ပေါ့။ ဘာမှလဲသိသေးတာမဟုတ်။ တွေ့ရတဲ့လူတွေက ရွာကာလသား၊ မြို့ကာလသားတွေ။

ပြောလို့ပြောတာမဟုတ်ဘူး၊ ကျွန်တော်တို့အနီးတစ်ဝိုက်မှာတော့ ကျွန်တော်တို့စက်ကနာမည်သိပ်ရတာ။ ရွာကြိုက်၊မြို့ကြိုက်ပေါ့ဗျာ။ စက်ဆရာအတော်များများကတော့ သူတို့စက်ကိုနာမည်လေးတွေပေးထားကြတယ်။ ပေးထားတဲ့နာမည်ကိုလဲ စက်ထည့်တဲ့သေတ္တာထဲမှာအသေအချာရေးထားကြတယ်။ ကျွန်တော်တို့စက်ကတော့နာမည်မရှိဘူး။ ကိုသန်းဦးစက်ဆိုရင်အကုန်သိတယ်။ အဒေါ်ယောက်ျားကလဲ ရန်ကုန်ကိုသူကိုယ်တိုင်သွားပြီး ကောင်းပေ့ဆိုတာမျိုးတွေချည်းရွေးဝယ်တာ။ တစ်ခုခုဖြစ်ရင်လဲရန်ကုန်ပဲသွားပြင်တယ်။ ကက်ဆက်ခွေဆိုတာကလဲ အကုန်မာစတာခွေတွေချည်းပဲ။ ကက်ဆက်သေတ္တာမှာထွက်သမျှအခွေအကုန်အပြည့်။ ကြိုက်တဲ့အယ်လ်ဘန်ရွတ်လိုက်၊ အကုန်ရှိတယ်ဆိုတဲ့အပေါက်မျိုး။ ဟင်္သာတထွန်းရင်၊ တွံတေးသိန်းတန်၊ တွံတေးစိုးအောင်၊ မာမာအေး၊ တင်တင်မြအစ မင်းအောင်၊အောင်သူ၊စိုးလွင်လွင်အလယ်၊ လေးဖြူ၊အငဲ၊မျိုးကြီးအဆုံး အကုန်ရှိတယ်။ ကလေးကြိုက်၊လူငယ်ကြိုက်၊လူကြီးကြိုက်၊ ကြိုက်ချင်သလိုသာကြိုက်၊ ကျွန်တော်တို့စက်မှာကပါပြီးသား။ ပြက္ခဒိန်ပေါ်မှာစက်လိုက်ရမယ့်ရက်တွေ ကြက်ခြေခတ်ထားလိုက်တာ၊ မင်နီအိုးမှောက်ထားလားထင်ရအောင် တစ်နွေလုံးရဲပတောင်းခပ်နေတာ။
စက်ငှားရင် ငှားတဲ့အိမ်က အကြိုအပို့အကုန်တာဝန်ယူရတာ။ ရွာတွေဆိုရင်တော့ နွားလှည်းနဲ့အိမ်တိုင်ယာရောက်လာခေါ်တယ်။ စက်သေတ္တာတင်တာကအစ သူတို့ကိုယ်တိုင်တင်ပေးတယ်။ ကျွန်တော်အမုန်းဆုံးကတော့ အလှူတွေမှာ မနက်အစောကြီးထပြီးစက်ဖွင့်ရတဲ့ဒုက္ခ။ မနက်လေးနာရီလောက်တည်းက မင်္ဂလာရှိအောင်ဆိုပြီး၊ မေတ္တာပို့တို့၊ ဗျောသံ၊ စည်သံတွေပါတဲ့သီချင်းတွေဖွင့်ပေးရတာ။ အဲဒါတွေကလဲ ခုခေတ်စီဒီခွေတွေလို လိုချင်တဲ့သီချင်းကိုတန်းသွားလို့ရတာမဟုတ်။ ကက်ဆက်ခွေကိုအဆင်သင့်ဖွင့်လို့ရအောင် အစတည်းက ကြိုရစ်ထားရတာ။ ကျွန်တော်ကတော့ ဖွင့်ပေးပြီးရင်ပြန်အိပ်တာပဲ။ ဘေးနားက စောင်းဘောက်ကြီးက တဒုန်းဒုန်းထုနေလဲ စောင်ခြုံပြီး မရရအောင်ကွေးတာ။ အဲဒီကက်ဆက်ခွေရစ်ရတဲ့ဒုက္ခကလဲ ကိုးဆူကပ်ဆရာတို့၊ ဘိတ်သိပ်ဆရာတို့နဲ့တွေ့ရင် အတော်လက်ပေါက်ကပ်တယ်။ သူတို့က ဘယ်အခွေထဲကဘယ်သီချင်းကို၊ သူတို့ဟောပြောပြီးတာနဲ့ တန်းဖွင့်ပါဆိုတာမျိုးလုပ်ခိုင်းတယ်။ ဥပမာ ဘိတ်သိပ်ဆရာဆိုရင် သူဟောပြောပြီးတာနဲ့ မင်္ဂလာစည်တော်တီးတဲ့တီးလုံးဖွင့်ခိုင်းပြီး၊ သတို့သားနဲ့သတို့သမီးကို လမ်းတွဲလျှောက်ခိုင်းတာမျိုးပေါ့။ ကိုးဆူဆရာဆိုရင်လဲ စည်တော်ယွန်းပေးရတာမျိုးပေါ့။ အဲဒါမျိုးက ခွေမှားမှာလဲကြောက်ရတယ်။ မှားလဲမှားတတ်ပါတယ်။ စည်တော်ယွန်းရမယ့်နေရာမျိုးမှာ၊ ရွာကာလသားတွေက ကက်ဆက်ခွေသေတ္တာကို ကိုယ်မသိအောင်ဝင်မွှေထားတော့၊ နေရာတွေကလွဲနေရော၊ အဲဒါနဲ့ ဗဒင်ရဲ့”သူနဲ့ကြမှတိုက်တိုက်ဆိုင်ဆိုင်”ဆိုတာကြီးကထွက်လာတာမျိုးလဲကြုံဖူးတယ်။
ရွာကာလသားတွေဆိုတာကလဲ သူတို့လက်ထဲမိုက်ကရိုဖုန်းရောက်လို့ကတော့ ပြန်လွှဲပေးချင်ကြတာမဟုတ်ဘူး။ ဟိုသီချင်းလေးမရှိဘူးလား၊ ဇော်ဝင်းထွဋ္ဋ်ရဲ့ဆေးဆိုးပန်းရိုက်မျက်နှာလေးမရှိဘူးလားနဲ့၊ အနားမှာတသီသီလုပ်တော့တာ။ တချို့ဆိုရင် မရှိလဲနေဗျာ၊ မိုက်ကရိုဖုန်းသာကျွန်တော့်ကိုပေးဆိုပြီး၊ နောက်ကတီးလုံးသံမပါဘဲနဲ့ ဒီတိုင်းဆိုတာ။ အတီးပိုက်ရောက်ရင်လဲ သူ့ဘာသာပါးစပ်နဲ့လိုက်တီးသေးတာ။ တစ်ခါတလေများဆို ကိုယ်ကအိပ်ချင်နေပြီ၊ သူတို့ကဆိုကောင်းတုန်း၊ နောက်ဆုံးတစ်ပုဒ်၊ နောက်ဆုံးတစ်ပုဒ်နဲ့ မနက်သုံးနာရီထိုးရော။ လေးနာရီလောက်ကျ ပြန်ထပြီးဖွင့်ရပြန်ရော။ တစ်ခါတလေများဆို ဒီဘက်ရွာဖွင့်ပြီးတာနဲ့ ဟိုဘက်ရွာကိုချက်ချင်းကူးရတာ။ စက်တွေထည့်ထားတဲ့သေတ္တာကိုလှည်းတွေပေါ်တင်၊ အဲဒီသေတ္တာတွေပေါ်ကမှ လူကတက်စီးရတာ။ အိပ်ရေးကလဲပျက်လားတော့ သေတ္တာတွေပေါ်မှာကွေးပြီးလိုက်ရတာ၊ လှည်းကကစင်းရိုးကျော်လို့လှုပ်လှုပ်သွားတာများ ပုခက်နဲ့အိပ်နေရတဲ့အတိုင်းပဲ။ တစ်ခါတလေ ညဖက်ကြီးကို ဒီဘက်ရွာကနေဟိုဘက်ရွာကို သင်္ချိုင်းကုန်းဖြတ်ပြီးကူးရတာ။ သင်္ချိုင်းကုန်းထဲအဖြတ်ရောက်မှ နွားကရပ်နေလို့ဒုက္ခရောက်ဖူးသေးတယ်။
စက်ဆရာဆိုတာကတော့ ရွာမှာမျက်နှာအပွင့်ဆုံးပဲ။ အထူးသဖြင့်အလှူ့ရှင်နဲ့ရွာကာလသားတွေက သိပ်မျက်နှာသာပေးကြတာ။ ဆေးလိပ်၊လက်ဖက်မပြတ်ဘူး။ ဆေးလိပ်သောက်တတ်လို့ကတော့ ဖင်မီးခိုးထွက်အောင်သောက်လို့ရတယ်။ လက်ဖက်ဆိုတာများ လက်ကြိတ်ဆုံနဲ့ကြိတ်ထားတဲ့နှမ်းဆီစစ်စစ်ကိုဆမ်းပြီး ငါးကျည်းခြောက်နမ်းခြင်းနဲ့သုပ်ထားတာ၊ ကြိုက်သလိုခပ်၊ ငါးကျည်းခြောက်ကပါပြီးသားပဲ။ ကျွန်တော်ကဆေးလိပ်မသောက်တော့၊ လက်ဖက်ချည်းလှိမ့်စားတာ။ စက်ဆရာတွေကဝက်သားတော့မစားရဘူး။ စက်ကနတ်ကိုအပ်ထားတော့၊ ပေါင်တိုသားရှောင်ရတယ်ဆိုလား။ ကျွန်တော်တော့ကောင်းကောင်းနားမလည်ဘူး၊ မစားနဲ့ဆိုတော့လဲ မစားဘဲနေလိုက်တာပေါ့။ ကိုသူတော်ကတော့ ခိုးကျိတ်တာပဲ။ ကိုဆန်းသိရင်တော့ သူ့ကိုဆူတော့တာ။ ဒီလူကလဲ ဝက်သားဆိုသွားဖုံးမြုပ်အောင်ကိုက်ချင်တဲ့လူ။ ကာလသားတွေကလဲ သူတို့ညဖက်မှာ ကာရာအိုကေဟစ်ရဖို့က စက်ဆရာတွေကိုမျက်နှာလုပ်ချင်သလို၊ အလှူရှင်ကလဲဧည့်ဝတ်ကျေချင်တော့ ယမကာလေးကလဲပါတတ်တယ်။ ကျွန်တော်ကငယ်သေးတော့ အဲဒါတွေကကိုယ်နဲ့မဆိုင်ဘူး။ ဒါတောင်တစ်ခါမိလိုက်သေးတယ်။ ဖြစ်ပုံကဒီလို၊ နေ့ခင်းနေ့လည် နေတွေကလဲအရမ်းပူနေတော့စက်ကနားထားရတယ်။ လူတွေလဲတစ်ရေးတစ်မောအိပ်နေကြတာ။ ရွာကာလသားအချို့ကတော့ကွပ်ပစ်ပေါ်မှာ ဒန်ရေနွေးအိုးလေးတစ်လုံးနဲ့ဝိုင်းဖွဲ့နေကြတယ်။ ရေနွေးအိုးဘေးမှာက ပဲကြီးလှော်အကြီးကြီးတွေကို ရှောက်ရွက်၊ကြက်သွန်နီ၊ ငရုတ်သီးစိမ်းတောင့်လေးတွေပါးပါးလှီးပြီးသုပ်ထားတဲ့ပန်းကန်လေးကချလို့။ ကျွန်တော်လဲပျင်းပျင်းရှိတာနဲ့ သူတို့ဝိုင်းထဲဝင်ထိုင်ပြီး ရေနွေးသောက်မယ်ဆိုပြီးစက်နားကထလာခဲ့တာ။ ပန်းကန်လုံးအသေးလေးတစ်လုံးကလဲလွတ်နေတော့ အသာလေးငှဲ့လိုက်တယ်။ ရှေ့ကပဲကြီးလှော်သုတ်ပန်းကန်ကိုမျက်လုံးကရောက်နေတော့ ပန်းကန်လုံးထဲရောက်လာတဲ့ရေနွေးက အငွေ့မထွက်တာတောင်သတိမထားလိုက်မိဘူး။ ပဲကြီးလှော်သုပ်လေးတစ်ဇွန်းနှိုက်စားပြီး၊ ဝါဖန့်ဖန့်ရေနွေးလေးတစ်ခွက်ကျိုက်လိုက်တာ ချိုခါးခါးကြီးနဲ့ဘယ်လိုကြီးဖြစ်သွားမှန်းကိုမသိလိုက်ဘူး။ လက်စသပ်တော့ ဒင်းတို့က ရေနွေးအိုးထဲကို တောအရက်နဲ့ဘာလီရည်နဲ့စပ်ပြီး ပဲကြီးလှော်သုတ်နဲ့ ဟန်မပျက်ဆော်နေကြတာလေ။ တချို့ရွာတွေမှာတော့ ကာလသားတွေကနည်းနည်းဆိုးတယ်။ တစ်ခါကဆို ကျွန်တော်တို့ကိုအရက်သောက်ခိုင်းတာ မသောက်လို့ဆိုပြီးရန်လုပ်တယ်။ ကိုဆန်းကလဲစိတ်ကလက်တစ်ဆစ်ဆိုတော့ သူနဲ့စကားများကြတာ၊ နောက်ဆုံး အလှူအိမ်ကလူကြီးက သူ့ရွာသားကိုဆွဲခေါ်သွားမှပွဲသိမ်းသွားတယ်။ တချို့ကာလသားတွေကလဲရီရတယ်။ သူငယ်ချင်းမင်္ဂလာဆောင်မှာ “သူများနဲ့ညားတဲ့ငါ့ရည်းစား”ဆိုတဲ့သီချင်းမျိုးကို ကာရာအိုကေဟစ်ချင်ဟစ်သေးတာ။ တစ်ခါတလေအလှူက တစ်ရွာတည်းမှာနှစ်ခုတစ်ပြိုင်တည်းဖြစ်နေတတ်တယ်။ အဲဒီအခါမျိုးဆိုရင် ဟိုဖက်နဲ့ဒီဖက် စက်ကိုအပြိုင်ဖွင့်ကြတာ။ ကျွန်တော်တို့ကစက်ကို ဘယ်လောက်ပဲအကျယ်ကြီးဖွင့်ပေးပေး အလှူ့ရှင်ကတိုးတယ်ချည်းပြောတာ။ လော်စပီကာနှစ်ခုကို သစ်ပင်ပေါ်တက်ချိပ်ပြီး၊ ဟိုဘက်အလှူရှိတဲ့ဘက်ကိုပဲလှည့်ထားပေးရတယ်။ စောင်းဘောက်နှစ်လုံးကိုလဲ တစ်ဖက်အလှူရှိတဲ့နေရာလောက်မှာအသံသွားဆုံအောင်မျက်နှာခြင်းဆိုင်ပေးရတယ်။ တစ်ခါတစ်လေ တစ်ရွာတည်းသားချင်းမင်္ဂလာဆောင်ကြပြီး၊ မိန်းကလေးအိမ်နဲ့၊ ယောက်ျားလေးအိမ်က မင်္ဂလာဆောင်ကိုတစ်ပြိုင်တည်းလုပ်ကြတာလဲကြုံဖူးတယ်။ သတို့သားနဲ့သတို့သမီးကနှစ်နေရာလုံးကို ဧည့်ခံပေးရတာ။ အဲဒီအခါမျိုးဆိုရင်လဲစက်ကိုအပြိုင်အဆိုင်ဖွင့်ကြတယ်။ ခုနောက်ပိုင်းကတော့ စီဒီစက်၊ဒီဗွီဒီစက်တွေပေါလာတော့ အဲဒါတွေပဲသုံးကြတော့မယ်ထင်တယ်။ ညီပုလေးဝတ္ထုတိုဖတ်ပြီး ကျွန်တော်လဲ တစ်ခါလောက်တော့ အလှူဖြစ်ဖြစ်၊မင်္ဂလာဆောင်ဖြစ်ဖြစ်၊ တစ်နေရာရာမှာတော့စက်ပြန်ဖွင့်ချင်သေးတယ်။ ကိုဇနိ၊မဇနိရဲ့မင်္ဂလာဆောင်မှာပဲဖြစ်ဖြစ်၊ ကိုမောင်လုံးကြီးရဲ့ကလေးရှင်ပြုမှာပဲဖြစ်ဖြစ်ပေါ့။ အကြောင်းသာကြားလိုက်ပါဗျာ၊ အဟုတ်ရောက်အောင်ကိုလာပြီးဖွင့်ပေးဦးမှာ။

7 comments:

ဇနိ May 9, 2008 at 5:32 PM  

ကိုဖြူရေးတာလည်း ဖတ်လို့ကောင်းတာပဲ။
ကျနော်တို့မင်္ဂလာဆောင်ကျမှ ကိုဖြူကိုခေါ်ရဦးမယ်ဗျာ။
ညတော့ စက်ကိုစောစောသိမ်းရမယ်။

tmn May 9, 2008 at 5:39 PM  

ဘာလို့လဲ ကိုဇနိရဲ့...တစ်ညလုံးဖွင့်ပါစေဗျာ...ကိုဖြူက သီချင်းနဲ့လဲ ဧည့်ခံဦးမှာ....ကစ်စနား ဆိုပီးတော့...:P

မေအောင် May 9, 2008 at 6:57 PM  

ကိုဖြူကရော
တီးလုံးမပါပဲ
ချာတိတ် ..ဟိတ်.ဟိတ်.ဟိတ်
လို့မဆိုဘူးလား။

ဇနိ May 9, 2008 at 7:07 PM  

ကိုကြီးလုံး မင်္ဂလာဆောင်မှပဲ တစ်ညလုံးဖွင့်တော့နော
မောင်ဖြူက အခုထိမရေရာသေးတော့ ကိုလုံးရဲ့ နွားတစ်ထောင်လောက်လည်း လာမောင်းပေးဦးမယ်။
သတိသာထား ကိုလုံး

မောင်ဖြူ May 9, 2008 at 9:19 PM  

ကိုဇနိရေ မင်္ဂလာဆောင်ရင်တော့ လက်သာတို့လိုက်၊ ဒန်ရေနွေးအိုးလေးနဲ့တော့ ဧည့်ခံဦးနော်...
ကဉ္စနာသီချင်းသံကြားရင်စိတ်နာပါတယ် ကိုကြီးလုံးရာ၊ မပြောပါနဲ့တော့ :D
ဘယ်နေလိမ့်မလဲ မမေအာင်ရယ် ဒါမျိုးက အလွတ်ပေးကောင်းတာဟုတ်ဘူး :P

ကေလေး May 10, 2008 at 12:34 PM  

မောင်ဖြူရေ…
တကယ့်စက်ဆရာကြီးပါလား
MTU ကထိန်တုန်းက ဒိုးပတ်ဝိုင်းမှာ ၀ါးလက်ခုပ်တီးနေတာတောင် ပြန်မြင်ယောင်လာတယ်ဟေ့

ကေလေး May 10, 2008 at 12:36 PM  

ဇနိအတွဲ မင်္ဂလာဦးညကျမှ တစ်ညလုံး မအိပ်ရအောင် မောင်ဖြူကို စက်ဖွင့်ခိုင်းရမယ်
ဟား ဟား

  © Blogger templates Shiny by Ourblogtemplates.com 2008

Back to TOP