ငယ်သူငယ်ချင်း

‘’ငါတို့ရွာရဲ့မြို့ရိုးဟောင်းကြီးပေါ်ကိုထိုင်ပြီး ကျွန်းထဲမှာစိုက်ထားတဲ့ စိုက်ခင်းတွေကျွန်း ရွာတွေကိုကြည့်ရတဲ့အရသာကြောင့် အီဗယ်မျှော်စင်ကို..စိတ်မ၀င်စားသလို.လတ်ဆတ်တဲ့တော ပန်းရနံ့ကိုလည်း ရှယ်နယ်နံပါတ် 5..ရေမွှေးနဲ့ မလဲနိုင်တာအမှန်ပဲ ‘အိမ်ရှေ့တဲဆီမှ ကျယ်လောင်စွာ အော်ပြောနေသော စိန်ကြီး၏ အသံသည် အိမ်ပေါ်မှ စုကြားအောင်တမင်ပြောခြင်းဖြစ်သည်။ အာလူး…. စုသည်စိတ်ထဲမှ ရေရွတ်လိုက်ပြီး ဓာတ်စက်နားထောင်မလို့ ဓာတ်ပြားတွေဖုန်သုတ်နေရာမှ ရပ်လိုက်သည်။ ဒီတစ်ချပ်ဆိုရင် စိုးမိုးမေတ္တာနားထောင်လို့ရပြီ။ ဒါပေမဲ့ဖုန်သုတ်ရတာလက်ညောင်း၍ ဓာတ်စက်ကိုလည်း လှည့်နိုင်မည်မထင်တော့။ ပြီးတော့…စုသည်ဓာတ်ပြားတွေကိုထားခဲ့ပြီး ဘုရားခန်းသို့ဝင်လိုက်သည်။ နမောတဿ အစချီကာ ဓမ္မစင်္ကြာဖြင့် ကျယ်ကျယ်လေးဘုရားကန်တော့သည်။’ သူတော်ကောင်း သူမြတ်လောင်းတို့ ပို့သသောမေတ္တာ ပေးဝေငှသောကုသိုလ်အဖို့ဘာဂကို အကျွန်ုပ်ကလည်း ကောင်းစွာခံယူ၍ သာဓုအနုမောဓနာခေါ်ဆိုပါ၏ သာဓုသာဓုသာဓ’ု’ အမျှဝေပြီးသာဓုခေါ်သည်။ ကြေးစည်လေးကိုရိုက်ပြီးနောက် အိမ်ပေါ်မှအိနြေ္ဒဖြင့် ဆင်းလာခဲ့၏။ ဟင်း…ဘယ်ရမလဲ စုပဲ။

‘’စုကြီးပြန်ရောက်နေပြီကိုး။အိမ်ပေါ်တက်ပြီးဘာလုပ်နေတာတုန်း’’သိရက်သားနှင့်မေးသောကျော်ကြီးကိုစုမျက်စောင်းထိုးလိုက်ရင်း’’ဓမ္မစင်္ကြာရွတ်နေတာပေါ့ ။တရားဦးဓမ္မစင်္ကြာ ၊နင်တို့ အလွတ်မရဘူးမို့ လား ငါကအလွတ်ဆိုတာ ‘’ ဟုဂုဏ်လုပ်ကာပြောလိုက်သည်။(သူတို့က ဓဇဂ္ဂသုတ်တောင်မရသူတွေ)။
‘’နေပါဦး နင်က ဓမ္မစင်္ကြာတော့ရွတ်တာဟုတ်ပါပြီ၊ ဓရှည်စင်္ကြာရောအလွတ်ရလို့လား’’‘’ဟင်း ဘုရားကိုနော် နင်ငရဲကြီးလိမ့်မယ်။ တွေ့တွေ့ခြင်းနင်တို့နဲ့ရန်မဖြစ်ချင်ဘူးဟာ’’
‘’သြော ရန်ဆိုမှသတိရတယ် လူဆိုတာခြွေမှရံတာ နင်ပါလာတဲ့မုန့်တို့ကိုကျွေးဦးလေ။ ဒါမှဒို့ကိုနင့်အခြွေအရံလို့ သတ်မှတ်နိုင်မှာနော်’’ သူတို့သည် မုန့်စားချင်တိုင်း စုကိုမြှောက်ပြောလေသည်။ စုသည် ကြောင်အိမ်ထဲမှမုန့်ထုပ်ကိုသွားယူပြီး ကျွေးလိုက်ရသည်။
မုန့်စားရင်း သူတို့ခေါင်းစဉ်က ရွာအကြောင်းပြောင်းသွားသည်။ တစ်နှစ်လျင် ရွာနှင့် ကိုးလလောက် ခွဲခွာနေရသော စုသည် ရွာကြောင်းရပ်ကြောင်းများကို တမေ့တမောနားထောင်တတ်သည်။ သူတို့က ဒေါသဖြစ်စရာအကြောင်းကိုပြောလျင်လည်း ရယ်စရာနှင့်ဇာတ်သိမ်းသည်။ ရင်နာစရာအကြောင်းကို ပြောလျင်လည်း ရယ်စရာနှင့်နိဂုံးချုပ်သည်။ ရယ်စရာအကြောင်းကိုပြောလျင်တော့ရယ် စရာနှင့်ဇာတ်မသိမ်းပဲ တမင်ကြေကွဲအောင် လုပ်ကြံဖန်တီးပြောကြပြန်သည်။
‘’ဒါနဲ့ စကားမစပ် နင်မြို့မှာကျောင်းသွားတက်တာ မဝေလွင်လိုလဲလှမလာဘူး’’ မုန့်ကုန်ကာနီးတော့ သူတို့က ဖောက်လာသည်။’’မလှရင်လဲ ဘာဖြစ်လဲ’’ စုသည် စကားလုံးကြီးကြီးဖြင့်ပြန်ပြောချင်သော်လည်း ရုတ်တရက်စဉ်းစားမရတော့ မပြောနိုင်ပေ။
‘’စကားလက်အိုဟာရာနဲ့ မတူတာပေါ့ ဟ’’
ဤသို့စာာသံပေသံစကားလုံးများကို ရွေးချယ်သုံးနှုန်းတတ်သော၊ စကားပြောရာတွင် လှတောသား၏ အဘိုးဟုယူဆနိုင်သော၊ စာဖတ်ကျူးသည့် အထူးများ (အရူးများဟုမဆိုပါ) သည်စု၏ငယ်သူငယ်ချင်း များဖြစ်ပါသည်။ အမည်ရင်း စိန်နိုင် ကျော်နိုင် ကိုသူတို့ ဘာသာအပြန်အလှန်စိန်ကြီး ကျောက်ကြီးဖြစ်သွားပြီး စုသည်လည်းသူတို့ ပါးစပ်ဖျားတွင်အလိုလို စုကြီးဖြစ်သွားသည်။ စုမေမေသည် စာသင်ကျောင်းမရှိပဲ ဘုန်းကြီးကျောင်းသာရှိသောရွာတစ်ရွာတွင် အစိုးရကျောင်းစဖွင့်ခဲ့ရာမှ၊ ဘုန်းကြီးကျောင်းတွင် စာတော်သော စိန်ကြီးကျောက်ကြီးတို့သည် လေးတန်းမှစတက်ခွင့်ရခဲ့သည်။ ထိုမှစ၍ စုနှင့်အတန်းတူဖြစ်သွားပြီး စာပြိုင်ဘက်တွေလဲဖြစ်သည်။ အလယ်တန်း အထက်တန်းရာက်တော့ စုကအဖိုးအဖွားများရှိသောမြို့မှာ ကျောင်းသွားတက်သည်။ သူတို့က အထက်တန်းကျောင်းရှိသော စုတို့ရွာတွင်ကျောင်းတက်ခါ တစ်ပတ်လျင် စနေ၊တနင်္ဂနွေနှစ်ရက်သာ သူတို့ရွာပြန်၍ စုတို့အိမ်မှာပင်နေသည်။ မေမေသည် သူ့ချစ်တပည့်များကို.စာအုပ်စဉ် အပိုင်ပေးထားဟန်ရှိသည်။ စာအုပ်တွေထဲမှ စကားလုံး ကြီးကြီးများကို (စုရှေ့ဆိုလျင်ပိုပြီး) ပြောတတ်ကြသည်။ စုကလည်းသူတို့ကိုအရှုံးပေးလေ့မရှိပါ။ ရွာမှာမရှိသော နေ့စဉ်ထုတ်သတင်းစာထဲမှ အကြောင်းအရာများကိုတဖွဲ့တနွဲ့ပြောပြလိုက်သည်။ (ဒီတော့သူတို့ထက် uptodate ဖြစ်သွားရောမဟုတ်လား)
‘’စုကြီး နင်ဦးသြကျောင်းကိုသွားလိုက်ဦးနော်၊ ဆယ်တန်းဖြေရက်နောက်ကျတာမသိတော့ ဦးသြနင့်ကို ခဏခဏမေးနေတယ်၊ မနက်ဖန်သွားမလား၊ ဘယ်အချိန်လောက်သွားမလဲ’’
‘’အင်း မနက်ဖန်သွားမယ်လေ ဆွမ်းမစားခင်အချိန်လောက်ပေါ့ အဘွားတို့လှူလိုက်တာတွေ သွားကပ်ရင်းနဲ့ ’’
ဦးသြသည် စုတို့ကိုးကွယ်သော ဘုန်းဘုန်းကြီးဖြစ်သည်။ သူတို့ကကွယ်ရာတွင် ဦးသြ ဟုခေါ် ကြသည်။ ရှေ့ဆိုလျင်တော့ နားရွက်မခတ်ရဲအောင်ကြောက်ဒူးတုန်နေပြီ။
‘’ငါတို့တွေမနေ့ ကမှပြန်လာတာ။လက်ပံပင်ကြီးအောက်ရောက်တော့ နင့်ကိုသတိရနေကြတယ်
လက်ပံလဲဖူး စုကြီးလဲ……ပြန်မလာသေးဘူးလို့ ပါ’’
စုသည်လက်သီးပြလိုက်ပြီး’’လက်ပံပွင့်တွေကြွေနေပြီမို့လား မနက်ဖန်ကျရင် လက်ပံပွင့်လဲကောက်ခဲ့မယ်’’
‘’လက်ပံပွင့်ပဲကောက်မလား လက်ပံပင်ကြီးပဲပတ်ပြေးမလား ဟား ဟား ဟား’’
ကျောက်ကြီးကစုကိုနှိပ်ကွပ်လိုက်သည်။ စုသည်အရင်နှစ်တွေက ဘုန်းကြီးကျောင်းတက်ခဲ့ရသည်။
နွေကျောင်းပိတ်လျင် မေမေ့အစီအစဉ်အရ ဘုန်းကြီးကျောင်းတွင်စာတက်ရသည်။ ယဉ်ကျေးမှုမြန်မာ၊ အဘိဓမ္မာစာမေးပွဲများဖြေရန်အတွက်ဖြစ်သည်။ ကျောက်ကြီး၊ စိန်ကြီး၊ စုနှင့်မောင်လေးသာ အပြင်ကလာတက်သူတွေဖြစ်၍ ကျန်စာသင်သားများမှာ ဘုန်းကြီးကျောင်းသားများသာဖြစ်သည်။ စုသည် ဘုန်းကြီးကျောင်းတက်ရသည်ကို အလွန်ပျော်သည်။ ’’အလဿသကုတောသိပ္ပ အသိပ္ပဿကုတောဓနံ’’ ဘုန်းဘုန်းကြီးကချပေးပြီး စုကလိုက်ဆိုတော့ ထစ်အထစ်အ။ ဘုန်းဘုန်းက’’ နာနာရွတ် နာနာအံ’’ဟုမိန့်သည်ကိုလည်း စုကရယ်ချင်သေးသည်။ စုအပျော်ဆုံးနေ့မှာ နေ့ခင်းသုံးနာရီလောက်တွင် ဘုန်းဘုန်း၏ ‘’သျှန်….ရေး’’ ဟူသော အသံကြားရသည့်နေ့ ဖြစ်သည်။ ‘’တင်ပါ့ ဘုရား’’ဟု ကိုရင်ငသျှန်ပြန်လျှောက်လိုက်ပြီဆိုလျင် စုသည် အပျော်မျက်နှာကို မနည်းပဲထိန်းသိမ်းနေရသည်။ ‘’သျှန်ရေး’’ ဟူသော တိုတိုတုတ်တုတ် ဘုန်းဘုန်းအသံမှာ ဆွမ်းဟင်းကျန်များကို စုပေါင်းပြီး သရက်သီးခြောက်၊ ဗူးသီးခြောက်တို့နှင့် ဟင်းလေးချက်ရန် ကိုရင်ငသျှန်ကိ်ုတာဝန်ပေးသံဖြစ်သည်။ မကြာခင် စုတို့ဟင်းလေးချက်နှင့် ထမင်းစားရတော့မည်ဖြစ်သည်။ စားဖူးသမျှဟင်းများတွင် ဘုန်းကြီးကျောင်းမှဟင်းလေးချက်သည် စုအမက်ဆုံးဟင်းဖြစ်သည်။
မေမေက စုညနေစာကောင်းကောင်းမစားလျင် ‘’ဘုန်းကြီးကျောင်းကစားလာပြန်ပြီလား။ သမီးရယ် အဲဒါ ဘုန်းကြီးကျောင်းသားလေးတွေစားဖို့ ချက်တာ သူတို့၀၀လင်လင်စားပါစေ။ နောက်တစ်ခါမစားခဲ့နဲ့ မေမေမကြိုက်ဘူး’’ ဒီလိုနေ့ တွင်စုသည် မေမေနှင့်အခက်ကြုံရသည်။ ကျောင်းမှာလည်းစားရအောင် အိမ်မှာလည်း မေမေမရိပ်မိအောင် သူတို့နှစ်ယောက်ကအကြံပေးသည်။ စုတို့ရွာနှင့်ဘုန်းကြီးကျောင်းကြား လမ်းတွင် လက်ပံပင်အကြီးကြီးတစ်ပင်ရှိသည်။ ကျောင်းမှ ထမင်းစားခဲ့သောနေ့ဆိုလျင် အိမ်ကိုတန်းမပြန်ကြပဲ၊ စုက ထိုလက်ပံပင်ကြီးကိုပတ်ပြေးရသည်။ သူတို့ကထိုင်စောင့်နေကြသည်။ ပင်ပန်းပြီး ဗိုက်ချောင်လာမှအိမ်ပြန်ကြသည်။ လျှို့ဝှက်ချက်တစ်ခုကို သူတို့ကိုယ်တိုင်အကြံပေးပြီး အခွင့်သင့်တိုင်း စုကိုနှိပ်ကွပ်တတ်သော သူငယ်ချင်းကောင်းများဖြစ်သည်။ တစ်ခါတလေညောင်း၍ ’’ငါမပြေးချင်ဘူးဟာ’ ပြောလျင်’’မပြေးချင်ရင်မစားပဲနေပါ့လား၊ ဆရာမကြီးဆူရင်တော့ဒို့လဲမတတ်နိုင်ဘူး၊ အမှန်အတိုင်းတင်ပြရမှာပဲ’’ ဟုအကြပ်ကိုင်ကြသေးသည်။
စုသည် RIT တက်နေသည့် အစ်ကိုကြီးတစ်ယောက်က်ို သံယောဇဉ်တွေပိုကာ စာတွေအပြန်အလှန်ရေးမိသည်။ စာကို ရွာက စာတိုက်ပုံးမှာမထည့်ပဲ စိန်ကြီးနှင့်ကျောက်ကြီးကို စက်ဘီးနှင့် စာတိုက်ရှိသည့်မြိုလေးသို့ သွား၍ထည့်ခိုင်းသည်။ ကဲသောစုက တစ်ပတ်လျင်နှစ်ခါလောက်စာထည့်ခိုင်းတော့လည်း သူတို့ ကမငြိုငြင်ကြပါ။
ဒါပေမဲ့ ညလသာသာမှာ ဂစ်တာတီးရင် မောင့်အရိုင်းပန်းသီချင်းကိုဆို၍ ‘’ကံဇာတာကြွေချိန်လား ၀ဋ္ဋ်ကြွေးတွေမကုန်လို့ လား ရေတိမ်မှာ နစ် မွန်းရပြီ’’ ဟုစုကိုစောင်းမြောင်းလေသည်။ စုကတော့ ရေတိမ်နစ်ချင်တာတောင် ရေနဲ့ ဝေးတဲ့ ကန္တာရထဲရောက်နေသည့်ကိုယ့်အဖြစ်ကို လျို့ ဝှက်ထားရသည်။
ဒါကို သူတို့ သိရင်လက်ပံပင်ကြီးကိုပဲပတ်ပြေးခိုင်းဦးမလား…စိုးရိမ်ရသည်။
နှစ်တွေရှည်ကြာပြီဖြစ်၍ ယခုအခါစိန်ကြီးသည် ဒေါက်တာဘွဲ့ ယူရန်ကြိုးစားနေသည့် တက္ကသိုလ်မှ လက်ထောက်ကထိက။ ပညာလဲစုံကြင်ယာလဲစုံ သားလေးတစ်ယောက်ရနေပြီ။ ရှေ့ နေလုပ်ချင်လွန်း၍ ဥပဒေအထူးပြုယူခဲ့ရာမှ မာစတာဝင်ပြီးတက္ကသိုလ်ဆရာဖြစ်သွားသည်။
ရှေ့ နေဖြစ်ချင်သော စိန်ကြီးသည် မှန်ကန်သောဘက်မှ ရပ်တည်ကာ ရှေ့နေတစ်ဦးလို ပညာရေးစနစ် ကို အပြစ်မှကွင်းလုံးကျွတ်လွတ်အောင် စီရင်ထုံးနှင့်အညီ သင်ကြားနေသလား…စုမသိတော့ပါ။
ကျောက်ကြီးသည် ပညာရေးတက္ကသိုလ်တက်မည်၊ ကျောင်းဆရာလုပ်မည်တကဲကဲလုပ်သော်လည်း ဒ.လ.မ တက်၍ ယခုအခါဒုတိယမြို့တော်တွင် ဗိုလ်ဖြစ်နေပြီ။ ပညာရေးဘွဲ့ကို ကိုယ်တိုင်မယူခဲ့သော်လည်း B.ed ဘွဲ့ ရဆရာမကိုတော့ ရအောင်ဆွတ်ခူးထားသည်။ ဒီအချိန်ဆို ရဲစခန်းတွင် သူသည် ကျောင်းဆရာစိတ်ရင်း လေသံ ဟန်ပန်နှင့် သမာသမတ်ကျကျ ပြည်သူတွေကို ကူညီနေမည်လား…ဒါမှမဟုတ်……စုမသိတော့ပါ။
စုကတော့ မေမေ့အိမ်ကို ရောက်လို့ ဓာတ်စက်ကလေး ဖွင့်နားထောင်တိုင်း ငယ်သူငယ်ချင်းများကို လွမ်းမိပါသေးသည်။

မေအောင်