ကျွန်မချစ်သောဆရာများ

မဇနိ
3 July 2008

“အာစရိယ ဂုဏော အနန္တောပါ မြတ်ဆရာ၊ သားတို့ချစ်တဲ့ မြတ် မြတ်ဆရာ၊ သမီးတို့ချစ်တဲ့ မြတ်မြတ်ဆရာ“ ဒီသီချင်းသံကြားပြီဆိုရင် ကျွန်မ အလိုလို မျက်ရည်ဝိုင်းမိတတ်တယ်။ ဆရာဆိုတာ စေတနာ၊ ၀ါသနာ၊ အနစ်နာအပြည့်နဲ့ အရောင်အသွေးစုံတဲ့ မျိုးဆက်သစ်လူငယ်လေးတွေကို ပြုစုပျိုးထောင်ပေးခဲ့ကြတဲ့ ကျေးဇူးရှင်တွေပါ။ ဘယ်ကလေးက ဘယ်လိုစရိုက်ရှိတယ်ဆိုတာ သိပြီး ဘယ်လိုထိန်းရမယ်ဆိုတာ နားလည်တဲ့သူတွေဟာ မိဘနဲ့ ဆရာတွေပါ။ ချော့တခါ၊ ငေါက်တလှည့်နဲ့ လိုသလို ပုံသွင်းပေးခဲ့တဲ့ ဘ၀ပုံဖော်ပန်းချီဆရာတွေဆိုလည်း သူတို့ပါပဲ။ ကျွန်မဘ၀မှာ သင်ဆရာ၊ မြင်ဆရာ၊ ကြားဆရာတွေ အများကြီး ကြုံတွေ့ခဲ့ဖူးပါတယ်။ ဆရာအားလုံးဟာ ကျွန်မအတွက် ကျေးဇူးရှင်တွေပါ။ ကျွန်မစိတ်ထဲ အားကျ၊ အတူယူ၊ ချစ်ခင်မိတဲ့ဆရာတွေ အမှတ်ထင်ထင်ရှိခဲ့ဖူးပါတယ်။


ကျွန်မလေးစားမိပြီဆိုရင် အဲဒီဆရာတွေ ဘာလုပ်လုပ် သဘောကျနေတော့တာပါ။ ကျွန်မ သူငယ်တန်းကနေ ၄ တန်းထိ အတန်းပိုင်ဆရာမက ပထမဆုံး ကျွန်မရင်ထဲ ရောက်ခဲ့တဲ့သူပါ။ ဆရာမက ရုပ်မချောပါဘူး။ အသားခပ်ညိုညိုနဲ့ အရပ်အမောင်းကတော့ ကောင်းပါတယ်။ ဆရာမရဲ့ ထူးခြားချက်က စိတ်နှစ်မျိုးပိုင်ဆိုင်တယ်။ စာတွေမရတဲ့အခါ၊ စည်းကမ်းပျက်တဲ့အခါမျိုးမှာ ကြိမ်လုံးနဲ့ ခြေသလုံးကို ခပ်ဆတ်ဆတ်လေးရိုက်တတ်ပါတယ်။ မျက်နှာထားလည်း တင်းနေတတ်တယ်။ ဒါပေမယ့် ကလေးတွေ ကျောင်းမလာတဲ့အခါ အိမ်အထိလိုက်မေးတတ်တယ်။ နေမကောင်းရင် ဆေးလုံးလေးတွေ ယူလာပေးတတ်တယ်။ စာအုပ်မတတ်နိုင်တဲ့သူဆိုရင် စာအုပ်လေးတွေ ပေးတယ်။ ခဲတံ၊ ပေတံကအစ ဆရာမက ပေးပါတယ်။ ကျောင်းကျန်းမာရေးလာလို့ ဆေးထိုးရမည့် ကလေးတွေဆို ဆရာမကိုယ်တိုင် လိုက်ပို့ပေးတယ်။ ကြောက်အားကြီးနေတဲ့ကလေးတွေကို ဆရာမက သူ့ကိုဖက်ထားပြီး အားကိုးစေခဲ့တယ်။ ကလေးတွေကလည်း ချစ်ကြောက်ရိုသေကြပါတယ်။ စကားပြောကောင်းတဲ့ဆရာမက မိဘဆရာအသင်း ဆုပေးပွဲတွေမှာဆို မိန့်ခွန်းအမြဲပြောတယ်။ ဆရာမမိန့်ခွန်းပြောတဲ့အချိန်ဆို ကျွန်မရင်ထဲမှာ ဆရာမက သူရဲကောင်းကြီးကို ဖြစ်လို့နေမိတယ်။ တတန်းလုံး သိပ်ချစ်တဲ့ဆရာမက ၄ တန်းနှစ်ရောက်တော့ ချစ်သူရှိတယ်လို့ ကြားရတယ်။ ကလေးတွေ ငိုကြတယ်။ ညအပိုချိန်တွေခေါ်ရင် အဲဒီလူကြီး လိုက်တာတတ်တယ်။ ကျွန်မတို့ ဆရာမကို စိတ်ဆိုးကြတယ်။ အဲဒီလူကြီးကို စကားမပြောဘူး။ ချစ်စရာကောင်းတဲ့ဆရာမက သူ့ကလေးတွေ အဲဒီလူကြီးကိုချစ်အောင် စာဝင်သင်ခိုင်းတယ်။ သူကိုယ်တိုင်ကျောင်းဆရာဖြစ်တဲ့ အဲဒီလူကြီးက ပုံပြင်တွေပြောပြပြီး ကျွန်မတို့ တတန်းလုံးကိုစည်းရုံးပြီး ကျွန်မတို့ပိုင် ဆရာမလေးကို အပိုင်ယူချသွားတယ်။ ပြန်တွေ့တဲ့အချိန်တိုင်း ဆရာမရှေ့မှာ ကလေးပေါက်စပြန်ပြန်ဖြစ်သွားရတယ်။ ကျွန်မလက်ရေးလေးတွေက ဆရာမလက်ရေးနဲ့ ခပ်ဆင်ဆင်ဖြစ်တဲ့အထိ ကျွန်မ လေးစားချစ်ခဲ့မိတယ်။

ကျွန်မချစ်မိတဲ့နောက်ဆရာမကတော့ ယောက္ခမလောင်း မေမေဆရာမပါ။ ကျွန်မ ၈ တန်းနှစ်က အတန်းပိုင်ဆရာမဖြစ်ခဲ့ဖူးတယ်။ မနက်ခင်းတိုင်း ညနေတိုင်းမှာ အတန်းကို အပြေးရောက်လာပြီး စာကျက်ပါ၊ စာကျက်ပါလို့ မမေ့မလျော့ လာပြောတဲ့ ချစ်ဆရာမပါ။ အမြဲတန်း လိမ္မာအောင်၊ စာကြိုးစားအောင် သင်ပေးတဲ့ ဆရာမပါ။ ပိုက်ဆံရှိတာမရှိတာကို အလေးမထားဘဲ စာကြိုးစားတဲ့သူကို မြေတောင်မြှောက်ပေးလို့ ချစ်ခဲ့ရတာပါ။ ကျွန်မတို့ တက္ကသိုလ်တက်တော့လည်း သူ့သားဆီလာရင်းနဲ့ တမြို့ထဲကလေးတွေကို သူ့သားသမီးတွေလို ထမင်းတွေ အမြဲလိုက်လိုက်ကျွေးတတ်ပါတယ်။ စားကောင်းသောက်ဖွယ်တွေကို သားတို့စား သမီးတို့စားဆိုပြီး ပန်းကန်တွေထဲ အတင်းထည့်ပေးပြီး ကျွေးတတ်တယ်။ ကျောင်းသွားတက်တဲ့အခါတိုင်း လက်ဖက်၊ စားစရာနဲ့ သနပ်ခါးတုန်းတွေ ပေးတတ်တယ်။ ကျွန်မတို့ အောင်မြင်မှု တခုခုရလျင် ဂုဏ်ယူနေတတ်တယ်။ ရှုံးနိမ်မှုနဲ့ကြုံရရင် အားမငယ်ဖို့ အားတွေပေးတတ်တယ်။ ကျွန်မကျောင်းပြန်လာလို့ အိမ်သွားလည်ရင် ကျောင်းသွားမည့်ခြင်းတောင်းချပြီး ကျောင်းမသွားဘဲ စကားတွေထိုင်ပြောနေတတ်တယ်။ ကျွန်မဘ၀ရဲ့ အဆိုးအကောင်းအားလုံး မျှဝေခံစားပေးတဲ့ ဆရာမတယောက်ဖြစ်လို့လည်း လေးစားချစ်ခင်မိပါတယ်။

ကျွန်မလေးစားချစ်ခင်ရတဲ့ ဆရာကြီးတယောက်ကတော့ ၀ိုင်တီယူက ကျွန်မတို့ ဌာနမှုးဖြစ်ခဲ့ဖူးပါတယ်။ အခုတော့ ပင်စင်ယူသွားပါပြီ။ ကျောင်းသားတွေ သိပ်ချစ်ကြတဲ့ ဆရာကြီးရဲ့ ပင်စင်ယူနှုတ်ဆက်ပွဲမှာ ၀ိုင်တီယူရဲ့ ဟောလ်ခန်းကြီးလျှံထွက်နေပါတယ်။ “ကျုပ်ကို တာဝန်အရ ပင်စင်ပေးပေမယ့် ကျူပ်ဒီကျောင်းကြီးကိုတော့ လာနေမှာပဲ၊ ဘယ်သူမှ ကျုပ်ကိုတားလို့မရဘူး“လို့ ပြောခဲ့တဲ့ ဆရာကြီးရဲ့အသံကို မမေ့နိုင်ပါဘူး။ အခုချိန်ဆို ဆရာကြီး ကျောင်းကို သတိရတိုင်းလာနေလေမလား။ သူကိုယ်တိုင်ဒီဇိုင်းဆွဲဆောက်ထားတဲ့ နန်းတော်တမျှခမ်းနားတဲ့အိမ်ကြီးကို အရောက်သွားလို့ကန်တော့တဲ့အခါ “ငါ့အတွက် ဘာမှမလိုဘူး၊ အခုချိန်ပေါ့လေ။ နောင်လိုရင် မင်းတို့မပေးလည်း လာတောင်းမယ်၊ ပြန်ယူသွား“ဆိုပြီး လက်မခံခဲ့တဲ့ဆရာကြီး။ အတန်းနားချိန် ၁၀ မိနစ်ပေးရင် “ကဲ ကဲ လွတ်လွတ်လပ်လပ်အနားယူ“ဆိုပြီး ခပ်ဝေးဝေးမှာ ကုလားထိုင်လေးတလုံးနဲ့ သွားနေခဲ့တဲ့ဆရာကြီး။ ကျွန်မတို့မေဂျာမှာ ခက်တယ်လို့ယူဆရတဲ့ဘာသာကို ဟန်ပါပါနားလည်အောင် တွေးခေါ်တတ်အောင် သင်ပေးတဲ့စသင်တဲ့နည်းဗျူဟာတွေ ပိုင်တဲ့ဆရာကြီး။ စကော်လာလျှောက်ရင် recommendation letter မှာ လက်မှတ်ထိုးဖို့ကို လမ်းမှာမြင်ရင်တောင် လှမ်းတောင်းပြီး လက်မှတ်ပေးခဲ့တဲ့ဆရာကြီး၊ စကော်လာမပါရင် “စိတ်မပျက်နဲ့ငါ့တပည့်၊ ဆရာတုန်းက ၈ ခါမြောက်မှာ အင်္ဂလန်ကို သွားရတာ“ ဆိုပြီး အမြဲအားအင်တွေပေးခဲ့တဲ့ ဆရာကြီး၊ တပည့်တွေကို လူကြီးလိုဆက်ဆံတတ်တဲ့ဆရာကြီး thesis ခေါင်းစဉ်တွေရွေးတဲ့အခါ “ဖြစ်နိုင်မလား မင်းနဲ့ငါ စဉ်းစားကြည့်ကြမယ်ကွာ“ ဆိုပြီး ယုံကြည်မှုတွေ ထားတတ်အောင် သင်ပေးခဲ့တဲ့ ဆရာကြီးကို ကျွန်မသိပ်လေးစားချစ်ခင်မိပါတယ်။ တကယ်တော့ ဆရာကြီးဟာ ပညာလည်း သိပ်တော်ခဲ့တယ်။ ထက်မြက်တယ်။ အင်မတန် ရိုးသားတည်ကြည်တယ်။ ဆရာကြီးပင်စင်ယူနှုတ်ဆက်ပွဲမှာ နိုင်ငံတကာရောက်နေတဲ့ သူ့တပည့်တွေ ပြန်လာကြတယ်။ အမြို့မြိုရောက်နေတဲ့ တပည့်တွေလည်း တက်ရောက်ခဲ့ကြတယ်။ အဲဒီပွဲမှာ ကျွန်မတို့က ငချွတ်ကလေးတွေအနေနဲ့ တက်ခဲ့ရတာပါ။ အားလုံးက အင်ဂျင်နီယာကြီးတွေ အရေးပါတဲ့လူကြီးတွေ တက်ရောက်ကြတဲ့ပွဲပါ။ ဆရာ့တပည့်ဟောင်း ကျောင်းသားတယောက်ကတော့ “ဆရာကြီးအလုပ်က ပင်စင်ယူပေမယ့် ကျွန်တော်တို့ရင်ထဲက ဆရာကြီးကို ဘယ်တော့မှ ပင်စင်မပေးပါဘူး၊ အမြဲတန်းဆရာကြီးပါ။ ကျွန်တော့်အမျိုးသမီးကလည်း ဆရာ့တပည့်မဆိုတော့ teacher in law လဲ ဆရာကြီးပါ၊“ လို့ လှိုက်လှိုက်လှဲလှဲ ပြောသွားခဲ့ပါတယ်။ ကျွန်မရင်ထဲက ဆရာကြီးကို လေးစားတဲ့စိတ်ကလည်း ဘယ်တော့မှ ပင်စင်မပေးဘဲ ထာဝရဖြစ်တည်နေမယ်ဆိုတာ အသေအချာပါပဲ။

နောက်ဆုံးကျွန်မချစ်မိတဲ့ ဆရာကတော့ အခု လက်ရှိဆရာပါ။ အင်တာနက်ကနေ ကျောင်းရှာတုန်းကတည်းက “သူ့ဆီတော့ မလျှောက်ဖူး၊ ခပ်တည်တည်ကြီး ကြောက်တယ်တော့“လို့ ကိုဇနိကို ပြောဖူးပါတယ်။ တိုက်တိုက်ဆိုင်ဆိုင်ပဲ သူဆီမှ ကျောင်းလာတက်ဖြစ်ပါတယ်။ လူမျိုးမတူပေမည့် ကျောင်းသားတွေအပေါ်ကို စာနာနားလည်မှုတွေ ပေးခဲ့တယ်။ ကျောင်းကို ဘယ်နှစ်နာရီလာရမယ်။ ဘယ်လိုနေမှ ကြိုက်တယ်ဆိုတာ တခွန်းမှ မပြောခဲ့ပါဘူး။ သူ့ပညာရပ်မှာ နာမည်ကြီးတဲ့ ဆရာကြီးပါ။ ကျွန်မတို့ကိုတော့ ဖခင်တယောက်လို ဆက်ဆံပါတယ်။ အသံတိုးတိုးပြောတတ်တဲ့ ကျွန်မစကားပြောတဲ့အခါ နားနားကပ်နားထောင်ပေးတဲ့ဆရာကြီးကို ကျွန်မ ချစ်ခင်မိပါတယ်။ လက်ချာလိုက်တဲ့အချိန်တိုင်းမှာလည်း ဆရာ့ရဲ့ ပညာတွေကို လေးစားမိရပြန်တယ်။ ဒီနေ့လည်း အင်တာနက်ကြိုးဟောင်းနေတယ် လဲပေးမယ်ဆိုပြီး သူ့ဟာသူ လာလဲတပ်ပေးပါတယ်။

ကျွန်မ ငယ်ငယ်ကလေးကတည်းက တွေ့ခဲ့ကြုံခဲ့သင်ခဲ့ဖူးတဲ့ ကျေးဇူးရှင်ဆရာတွေအများကြီးပါ။ အခုရေးပြခဲ့တဲ့ဆရာတွေကတော့ မှတ်မှတ်ထင်ထင်လည်းရှိလို့ သူတို့အကြောင်းကိုရေးခဲ့တာပါ။ သင်ဆရာ၊မြင်ဆရာ၊ ကြားဆရာများအားလုံးကို ဒီနေရာမှ ဂါရ၀ပြုလိုက်ပါတယ်။

မဇနိ